https://youtu.be/Mg4aogWJ2kc زمیں والوں کو رحماں نے کھلا دامان بخشا ہے مزیّن یہ نگینوں سے ہمیں رمضان بخشا ہے جو چاہیں مانگ لیں ہم بھی ترے سارے خزانوں سے ہمیں محبوب نے دیکھو کھلا میدان بخشا ہے ہے پیاسوں کی طلب پیارے فقط تُو ہی تو ساقی ہے معطّر جو کرے روحوں کو وہ عرفان بخشا ہے ترے اک عشق میں ہی بس سحر سے شام ہوتی ہے زباں پر رقص کرتا یہ ہمیں فیضان بخشا ہے رکن اسلام کے پانچوں بہت انمول ہیں پیارے پرو کے اک لڑی میں یوں ہمیں عنوان بخشا ہے فرشتوں کے احاطے میں یہ رہتی ہے زمیں ساری مرے لولاک پیارے نے حسیں مرجان بخشا ہے ترے انعام میں پیارے حسیں انعام یہ سب سے گناہوں کو یوں دھونے کا ہمیں سامان بخشا ہے بدل دیتا ہے تقدیریں وہ اک سجدہ گدائی کا خدائے کبریا نے ہی ہمیں ایقان بخشا ہے بجھے گی پیاس آنکھوں کی خدا ہی کا یہ وعدہ ہے عوض روزوں کے مولا نے درِ ریّان بخشا ہے تہجد کی نمازوں میں عجب کشفی نظارے ہیں خدا سے قرب کا دلکش ہمیں سامان بخشا ہے بہت افضال کا حامل ہے اس کا آخری عشرہ اسی کی ہی تجلی نے حسیں وجدان بخشا ہے مزے ہیں رتجگوں کے خوب گزریں جو عبادت میں خدا سے ہمکلامی کو ہمیں قرآن بخشا ہے (فہمیدہ بٹ، جرمنی)
