شُعاعِ انقلاب

زمین و آسماں بدلے ، رُخِ شمس و قمر بدلا

ذرا اُٹھ دیکھ اے بندے ستارۂ سحر بدلا!

تنِ گیتی میں روحِ تازہ پھر پھونکی مسیحا نے

ہوس خوردہ بنی آدم کا دل بدلا ، جگر بدلا

بڑھا ہے قافلۂ نوعِ بشر کا جانبِ منزل

وہی ذوقِ سکوں ہے آج در ذَوقِ سَفر بدلا

درختِ دیں کہ جو بے برگ و بَر تھا ایک مدّت سے

ثمر اُس میں لگے تازہ وہ دیرینہ شجر بدلا

پیامِ امنِ عالمگیر لایا حضرتِ مہدی

سلامِ زندگانی میں ، فسادِ بحر و بر بدلا

جبینِ نسلِ آدم جُھک گئی مسجود کے دَر پر

زِ فیض میرزا ہر یک کا اندازِ نظر بدلا

یہی دیوانگی فرزانگی پر آۓ گی غالب

نہ وہ سنگِ ستم بدلا ، نہ یہ شوریدہ سر بدلا

کریں گے ہم جہادِ نَو سے تسخیرِ دلِ آدم

برنگِ حجّت و برہاں دم تیغ و تبر بدلا

سمائی جا رہی ’’الدّار‘‘ میں ہے نَوعِ انسانی

حِصارِ کُل جہاں کی شکل میں مہدی کا گھر بدلا

نئے انداز سے پھر لالہ و گُل مسکرا اُٹھے

مسیحا کے نفس سے موجۂ بادِ سَحر بدلا

(عبدالسلام اسلامؔ)