اللہ تعالیٰ کے فضل و کرم سے مجلس خدام الاحمدیہ سینیگال کو اپنا آٹھواں نیشنل اجتماع مورخہ ۱۲تا۱۴؍ستمبر۲۰۲۵ءکو احمدیہ مشن ڈاکار میں منعقد کرنے کی توفیق ملی۔ ۱۱؍ستمبر بروز جمعرات ہی خدام قافلہ در قافلہ آنا شروع ہو گئے تھے۔ مورخہ۱۲؍ستمبر بروز جمعۃ المبارک اجتماع کا آغاز باجماعت نماز تہجد، فجر اور درس القرآن کے ساتھ ہوا۔ آٹھ بجے ناشتہ کے بعد خدام تیاری کرکے اجتماع گاہ تشریف لے آئے۔ ساڑھے نو بجے مکرم محمد سال سیک صاحب صدر مجلس خدام الاحمدیہ سینیگال نےلوائے خدام الاحمدیہ اور مکرم بشارت نوید صاحب امیر جماعت احمدیہ سینیگال نے سینیگال کا قومی پرچم لہرایا۔ بعد ازاں افتتاحی اجلاس منعقد ہوا۔ حضورانور ایدہ اللہ تعالیٰ بنصرہ العزیز کا خطبہ جمعہ لائیو دو زبانوں میں سننے کا انتظام کیا گیا۔ نماز جمعہ و عصر کی ادائیگی کے بعد کھانا پیش کیا گیا۔ اور علمی مقابلہ جات کا آغاز ہوا۔ شام کو ورزشی مقابلہ جات کا انعقاد کیا گیا۔ نماز مغرب و عشاء کے بعد مجلس سوال و جواب ہوئی۔ اگلے روز۱۳؍ستمبر کا آغاز باجماعت نماز تہجد، نماز فجر اور درس القرآن کے ساتھ ہوا۔ ۷ سے ۹ بجے تک ورزشی مقابلہ جات کا سلسلہ جاری رہا۔ ناشتہ کے بعد فائنل علمی مقابلہ جات ہوئے۔ تمام شاملین نے بھرپور جوش و جذبے سے تمام پروگراموں میں حصہ لیا۔ گیارہ بجے علمی و تربیتی مجلس کا انعقاد ہوا جس میں مختلف موضوعات پر تقاریر پیش کی گئیں۔ اجتماع میں مجلس اطفال الاحمدیہ کے چھ علمی اور سات ورزشی مقابلہ جات منعقد کروائے گئے اور مجلس خدام الاحمدیہ کے ۹ علمی و ۹ ورزشی مقابلہ جات کروائے گئے۔ اس کے علاوہ علمی و تربیتی مجلس کا انعقاد کیا گیا جس میں خدام الاحمدیہ کو ان کی ذمہ داریوں کی طرف توجہ دلائی گئی۔ امسال ہمسایہ ممالک، گیمبیا سے نائب صدر مجلس خدام الاحمدیہ اور گنی بساؤ سے صدر مجلس خدام الاحمدیہ نے اس اجتماع میں شرکت کی۔ ہفتے کی دوپہر ایک بجے اختتامی اجلاس کا آغاز ہوا جس میں نمایاں پوزیشنز لینے والے خدام میں انعامات تقسیم کیے گئے۔ دعا کے ساتھ اجتماع اختتام پذیر ہوا۔ اللہ تعالیٰ کے فضل سے کُل حاضری ۲۵۹؍رہی۔ اگلے روز مورخہ ۱۴؍ستمبر۲۰۲۵ء بروز اتوار مجلس شوریٰ برائے مجلس خدام الاحمدیہ سینیگال منعقد ہوئی۔ اللہ تعالیٰ تمام خدام کی ذہنی و جسمانی صلاحیتوں میں برکت ڈالے اور اجتماعات کے بابرکت ثمرات سے نوازے۔ (رپورٹ:حافظ مصور احمد مزمل۔ نمائندہ الفضل انٹرنیشنل) ٭…٭…٭
