اللہ تعالیٰ کے فضل سے مورخہ ۱۵؍نومبر ۲۰۲۵ء بروز ہفتہ واقفین نو و واقفات نو جماعت احمدیہ ڈنمارک کا سالانہ اجتماع مسجد نصرت جہاں، کوپن ہیگن میں منعقد ہوا۔ الحمدللہ علیٰ ذالک اس اجتماع کی تاریخ سال کے آغاز میں بننے والے وقف نو کے کیلنڈر میں شامل کی گئی تھی اور گاہے بگاہے اس اجتماع کے انعقاد اور تیاری کے سلسلہ میں یاددہانی بھی کروائی جاتی رہی نیز آن لائن کلاسز میں اس بات کا جائزہ بھی لیا جاتا رہا کہ واقفین بھر پور طریق سے اس اجتماع میں تیاری کے ساتھ شامل ہوں۔ اجتماع سے ایک ہفتہ قبل ہی واقفین نو اطفال و واقفات نو ناصرات کا آن لائن مقررہ مرکزی نصاب کا ان کی عمر کے مطابق جائزہ لیا گیا۔ افتتاحی اجلاس:پروگرام کے مطابق گیارہ بجے اجتماع کا آغاز مکرم محمد زکریا خان صاحب امیرو مبلغ انچارج جماعت احمدیہ ڈنمارک کی زیر صدارت تلاوت قرآن کریم اور نظم سے ہوا جس کے بعد تحریک وقف نو کے بارے میں ایک ڈاکومنٹری دکھائی گئی۔ اس افتتاحی اجلاس میں واقفین نو و واقفات نو کے ساتھ ان کےوالدین نے بھی شرکت کی۔ مکرم امیر صاحب نے افتتاحی تقریر میں وقف نو سکیم کا پس منظر پیش کیا اورواقفین کو عہد وقف کی ذمہ داریوں کو سمجھتے ہوئے اس کو نبھانے کی طرف توجہ دلائی۔ آپ نے والدین کو بھی ان کی ذمہ داریوں کی طرف توجہ دلائی کہ واقفین کی اپنے عملی نمونے سے تربیت کریں، نماز باجماعت اور خلافت سے مضبوط تعلق پیدا کریں اور ایم ٹی اے پر نشر ہونے والے پروگراموں کو اپنے بچوں کے ساتھ مل کر دیکھیں اور بچوں کی اس رنگ میں تربیت کریں کہ وہ خلیفۃ المسیح کے سلطان نصیر بننے والے ہوں۔ اس کے بعد آپ نے اجتماعی دعا کروائی۔ مختصر وقفہ کے بعد مقابلہ جات کا آغاز ہوا۔ واقفات نو کے مقابلہ جات نصرت ہال میں منعقد ہوئے جبکہ واقفین نو کے مقابلہ جات ناصر ہال میں ہوئے۔ اجتماع میں درج ذیل مقابلہ جات کروائے گئے: تلاوت قرآن کریم، اذان، نظم اور تقریر۔ اسی طرح واقفین نو خدام اور لجنہ سے نصاب کا آن لائن امتحان لیا گیا۔ اسی طرح خدام کے ساتھ الوصیت کے موضوع پر نیشنل سیکرٹری صاحب وصایا کے ساتھ ایک علمی نشست کا پروگرام رکھا گیا۔ سیمینار:نماز ظہر و عصر کی ادائیگی کے بعد والدین سیمینار میں شامل ہوئے جس کا موضوع ’’واقفین نو کے والدین کی ذمہ داریاں‘‘ تھا۔ سیمینار کا آغاز تلاوت قرآن کریم سے ہوا جس میں دو تقاریر تربیت اولاد کے بارہ میں تھیں۔ پہلی تقریر نیشنل سیکرٹری صاحب تربیت مکرم چودھری منیر احمد صاحب نے بچوں کی تربیت اور والدین کی ذمہ داریوں کے حوالے سے والدین کو تربیت کے طریق اور اپنی ذمہ داریوں کو صحیح رنگ میں سمجھ کر ادا کرنے کی طرف توجہ دلائی جبکہ دوسری تقریر مکرم عبد الرؤوف خان صاحب واقف نو کی تھی۔ بعد ازاں اس سیمینار میں شاملین کو دو گروپس میں تقسیم کردیا گیا جنہوں نے اس موضوع پر اپنی تجاویز دیں کہ ’’ہم آج کل کے معاشرہ میں واقفین نو کی کس طرح تربیت کریں کہ وہ حقیقی طور پر اسلام کے ایمبیسڈر بنیں؟‘‘۔ دونوں گروپس کی تجاویز آنے پر احباب کے سامنے ان کو پیش کیا گیا۔ اس سیمینار کے اختتام پر خاکسار (نیشنل سیکرٹری وقف نو جماعت احمدیہ ڈنمارک) نے مرکز سے موصولہ ہدایات والدین کے سامنے پیش کیں۔ الحمدللہ، یہ سیمینار بہت کامیاب رہا۔ اختتام:ساڑھے تین بجے واقفین نو کا اجتماع اختتام پذیر ہوا۔ مکرم امیر صاحب جماعت احمدیہ ڈنمارک نے واقفین نو میں پوزیشنز حاصل کرنے والوں میں انعامات تقسیم کيے جبکہ واقفات نو نےشام پانچ بجے صدر صاحبہ لجنہ اماء اللہ ڈنمارک کی صدارت میں یہ تقریب منعقد کی۔ اس اجتماع کے اختتام پر احباب کو کھانا پیش کیا گیا۔ الحمدللہ، یہ اجتماع کامیا ب رہا۔ کُل حاضری ۱۳۲؍رہی۔ اللہ تعالیٰ اس اجتماع میں شامل ہونے والوں کے ایمان و ایقان میں ترقی عطا فرمائے اور ہمیں ہر آن خلیفہ وقت کی نصائح کو سننے اور ان پر عمل کرنے کی توفیق دیتا چلا جائے۔ آمین (رپورٹ:محمد اکرم محمود۔ نمائندہ الفضل انٹرنیشنل)
