الله تعالیٰ کے فضل و کرم سے مجلس انصارالله فن لینڈ کو اپنا دسواں سالانہ اجتماع ۱۸و۱۹؍اکتوبر۲۰۲۵ء کو فن لینڈ کے شہر Vantaa کی مسجد نور میں انتہائی محبت، بھائی چارے اور دوستانہ ماحول میں منعقد کرنے کی توفیق ملی۔ الحمدللہ حضور انور ایدہ اللہ تعالیٰ بنصرہ العزیز کی طرف سے اجتماع کے انعقاد کی تواریخ کی منظوری کے بعد اجتماع کی تیاریاں شروع ہو گئی تھیں۔ ناظم اعلیٰ مکرم احمد فاروق قریشی صاحب کے ساتھ خاکسار کو بطور نائب ناظم اعلیٰ، ناظم پروگرام و اشاعت خدمت کی توفیق ملی۔ اجتماع کی تیاری میں بہتری کے لیے کمیٹی کی میٹنگز ہوئیں، حاضری بڑھانے کے لیے فلائرز و Promos تیار کیے گئے۔ پروگرام محنت سے ترتیب دے کر تمام انصار کو ارسال کیا گیا۔ نئے علمی و تفریحی مقابلہ جات شامل کیے گئے جنہیں خوب سراہا گیا۔ گذشتہ سال کے مثبت فیڈ بیک کے بعد اس سال بھی مسجد میں ’’انصار بیٹھک اور BBQ‘‘ کا انعقاد ہوا جس سے بھائی چارہ مزید مضبوط ہوا۔ وقارِ عمل و سٹیج کی تیاری:جمعہ ۱۷؍اکتوبر کو نمازِ جمعہ کی ادائیگی اور حضور انور ایدہ اللہ تعالیٰ کا خطبہ جمعہ سننے کے بعد نماز سینٹر میں انصار نے وقار عمل کیا اور سٹیج تیار کیا۔ انصار نے بہت محنت سے تمام کام سر انجام دیے اور وقت پر صفائی اور سٹیج کی تیاری نیز دوسرے شہروں سے آنے والے مہمانوں کی رہائش اور کھانے کا بندوبست کیا۔ انصار کے ساتھ کچھ خدام نے بھی بہت شوق سے وقار عمل میں حصہ لیا۔ پہلا دن:مورخہ۱۸؍اکتوبر بروزہفتہ اجتماع کا آغاز نماز فجر اور ناشتہ کے بعد صبح دس بجے خوشگوار موسم میں پرچم کشائی کی تقریب سے ہوا۔ صدر مجلس انصاراللہ فن لینڈ نے لوائے مجلس انصاراللہ جبکہ نیشنل صدر صاحب نے فن لینڈ کا پرچم لہرایا۔ صدر مجلس مکرم فرخ اسلام صاحب کی زیر صدارت افتتاحی تقریب کا آغاز ہوا۔ تلاوت قرآن کریم، عہد اور نظم کے بعد صدرصاحب مجلس نے اجتماع کے حوالے سے نصائح کیں۔ بعد ازاں مکرم شاہد محمود کاہلوں صاحب مبلغ سلسلہ فن لینڈنے حاضرین مجلس کو اجتماع کے مقاصد اور انصار کی ذمہ داریوں کی طرف توجہ دلائی۔ افتتاحی تقریب کے فوراً بعد مسجد میں ہی علمی مقابلہ جات کا آغاز ہوا، جن میں مقابلہ تلاوت قرآن کریم، اذان اور نظم شامل تھے۔ ان تمام مقابلہ جات میں انصارنے بہت ذوق وشوق سے حصہ لیا۔ ظہر و عصر کی باجماعت نمازوں اور کھانے کے بعد پروگرام کے اگلے حصہ میں مقابلہ اردو تقریر و تقریر فی البدیہہ نیز مقابلہ پنجہ آزمائی ہوا جس میں ہمیشہ کی طرح انصار نے بہت گرم جوشی سے حصہ لیا اور مقابلے میں شامل ممبران کی حوصلہ افزائی کی۔ اس کے بعد مشاہدہ و معا ئنہ کا دلچسپ مقابلہ ہوا۔ انصار بیٹھک و BBQ:بعد ازاں سہ پہر کو خدام الاحمدیہ کے تعاون سے لذیذ باربی کیو تیارکیا گیا۔ باربی کیو تیاری کے انتظار کے دوران مقابلہ ’’نشانہ بازی‘‘(Darts) نیز ایک دلچسپ مقابلہ پنگ پانگ گیندوں کو ہدف میں ڈالنے کا کروایا گیا جن میں تمام عمر کے انصار نے پرجوش شرکت کی اور باقی حاضرین خدام و اطفال نے بھی ان مقابلوں کو بہت سراہا۔ نمازمغرب و عشاء کے بعد پہلے بھرپور دن کا اختتام ہوا۔ دوسرا دن: ۱۹؍اکتوبر بروز اتوار اجتماع کے دوسرے دن کا آغاز مسجد میں باجماعت نمازِ فجر کی ادائیگی سے ہوا جس کے بعد ۸؍بجے ناشتے کا انتظام کیا گیا تھا۔ بعد ازاں تمام انصار مسجد سے چند منٹ کی مسافت پر واقع سپورٹس ہال تشریف لے آئے جو کرائے پر حاصل کیا گیا تھا۔ سپورٹس ہال میں بیڈ منٹن ڈبلز اور والی بال کی ٹیم گیمز ہوئیں، والی بال میں انصار کی گرم جوشی دیدنی تھی۔ اس کے بعد ثابت قدمی کا مقابلہ ہوا اور ہر سال کی طرح کا مقبول مقابلہ تقلید منعقد کروایا گیا۔ یہ مقابلہ پچھلے سالوں کی طرح امسال بھی بہت دل پسند رہا اور تمام احباب کے چہروں پر مسکراہٹیں بکھیر گیا۔ سپورٹس ہال میں شاملین کے لیے ریفریشمنٹ کا بھی انتظام تھا۔ دوپہر دوبجے ہال میں وائنڈ اپ کے بعد سب مسجد میں آگئے جہاں نماز ظہر و عصر و کھانے کے بعد کچھ وقت صدر مجلس انصار اللہ فن لینڈ اور نائب صدر صفِ دوم کے انتخابات کے لیے مختص تھا۔ بعدہٗ اجتماع کے اختتامی اجلاس کا آغاز ہوا۔ تلاوت قرآن کریم، عہد انصارالله اورنظم کےبعد صدر مجلس انصارالله نے امسال منعقد ہونے والے پروگراموں کی سالانہ کارگزاری رپورٹ پیش کی نیز اجتماع کمیٹی اور ان کے کاموں کا مختصر تعارف پیش کیا۔ علمی و ورزشی مقابلہ جات میں اعلیٰ کارکردگی دکھا نے والے انصار نیز پچھلے چند ماہ میں تعلیم کتاب کوئز میں مجموعی پوزیشن حاصل کرنے والوں نیز سائیکل چیلنج میں پوزیشن حاصل کرنے والوں میں انعامات تقسیم کیے گئے۔ بعد ازاں نیشنل صدر جماعت احمدیہ فن لینڈ نے تقریر کرنے کے بعد اختتامی دعا کروائی اور اجتماعی تصاویر ہوئیں۔ الله تعالیٰ کے فضل سے اس اجتماع کی کُل حاضری ۷۶؍رہی۔ الحمدللہ۔ اجتماع کے اختتام پرانصارنے مل کر مسجد میں وقار عمل کیا جس میں خدام نے بھی مدد کی۔ اللہ تعالیٰ اس اجتماع کو قبول فرمائے اور سب شاملین و کارکنان کو بہترین اجر دے نیز ہم سب انصار کو ہمیشہ خلافت کا خادم اور تابعدار بنائے رکھے۔ آمین (رپورٹ: طاہر احمد۔ نمائندہ الفضل انٹرنیشنل) ٭…٭…٭
