۲۶؍ ستمبر جمعۃ المبارک کو نماز فجر کے وقت ہوا ہلکی رفتار سے چل رہی تھی۔ سارا دن سورج آسمان پر چمکتا رہا اور زمین پر گرمی برساتا رہا۔ ہوا بند ہونے سے حبس اور گرمی جوبن پر پہنچ گئی۔ ہفتہ کے دن صبح کو ہوا بند تھی۔ دن بارہ بجے کے قریب آسمان پر ہلکے بادل تھے، ہوا نہ ہونے سے گرمی بڑھ گئی تھی۔ ٹمپریچر زیادہ سے زیادہ ۳۷؍ اور کم سے کم ۲۸؍ درجہ سینٹی گریڈتھا۔ اتوار کی صبح فجر کے وقت آسمان پر ہلکے بادلوں کی تہ موجود تھی۔ اور ساتھ ہی ہلکی ہواچل رہی تھی۔ اس آہستہ رفتار سے رواں دواں ہوا میں موسم سرما کی خوشبو موجود تھی۔ لیکن جونہی سورج نے مشرق سے سر باہر کیا تو ساتھ ہی گرمی بھی آگئی۔ منگل کو صبح فجر کے وقت ہوا بند تھی۔ دن بھر ہلکی ٹھنڈی ہوا چلتی رہی، موسم سرما کی آمد آمد ہے تاہم سورج ہے کہ اس کی ایک نہیں چلنے دے رہا۔ بدھ کو گر م دن تھا، ساتھ حبس بھی زیادہ ہوگیا۔ آسمان صاف ہونے کی وجہ سے سورج خوب چمکتا رہااور گرمی اپنے جوبن پر تھی، ہلکی ہوا نے کچھ موسم کو معتدل کیا۔ جمعرات کو بھی موسم کی یہی کیفیت رہی دھوپ سے گرمی زیادہ ہوگئی تھی۔ بادل آسمان پر کہیں کہیں نظر آتے تھے۔ دن بھر وقفے وقفے سے ہلکی ہوا چلتی رہی۔ یہ ہفتہ بھی مجموعی طور پر گرم، خشک اور ہلکی ہوا والا تھا۔ ٹمپریچر زیادہ سے زیادہ ۳۶؍ اور کم سے کم ۲۵؍ درجہ سینٹی گریڈ تھا۔ (ابو سدید) مزید پڑھیں: ربوہ کا موسم (۱۹تا ۲۵؍ستمبر ۲۰۲۵ء)
