۲۵؍جولائی جمعۃ المبارک کو نماز فجر کے وقت ہلکی ہوا چل رہی تھی۔ آسمان جزوی طور پر ابر آلود تھا، نماز جمعہ تک آسمان صاف ہوگیا اور دھوپ بھی نکل آئی ، جس سےموسم کچھ گرم ہوگیا۔ٹمپریچر زیادہ سے زیادہ ۳۷؍اور کم سے کم ۲۸؍درجہ سینٹی گریڈتھا۔یہ ہفتہ مجموعی طور پر گرم ، خشک اور حبس والا تھا ۔ گذشتہ ہفتہ میں مون سون کے موسم کے تحت کافی بارشیں ہوئیں، جس سے موسم خوشگوار بن گیا تھا۔ ہفتہ سے سوموار تک موسم کی کیفیت ایک جیسی تھی ۔ صبح کے وقت ہلکی ہوا اور آسمان پر ہلکے بادلوں کی پرت بھی موجود تھی جس کی وجہ سے دھوپ مکمل طور پر زمین پر نہ پہنچ سکی، لیکن حبس کی وجہ سے گرمی نے اپنے پیر جمائے رکھے۔ یہ موسم ایسا ہے کہ پنکھے کے نیچے یا سامنے سے ذرا اِدھراُ دھر ہوجائیں تو پسینہ آجاتا ہے۔ بعض لوگ تو پنکھے کے نیچے ہوتے ہوئے بھی یہ شکایت کرتے ہیں۔ منگل کو نماز فجر کے وقت حبس تھا یعنی ہوا بالکل نہیں چل رہی تھی، بعد میں ہوا چلنے سے کچھ سکون ہوا اور جان میں جان آئی۔ دن بھر آسمان پر موجود ہلکے بادلوں کی تہ کی وجہ سے سورج کی روشنی مکمل نہیں تھی۔ لیکن گرمی موجود تھی۔بدھ کو ٹھنڈی ہوا چلنے سے اللہ تعالیٰ کے فضل سے موسم اچھا ہوگیا۔سارا دن یہ ہوا چلتی رہی بلکہ شام کے وقت تو اس میں خنکی بھی آگئی۔ رات بھر اس ہوا کے مزے ، کھلے آسمان تلے سونے والے لوگوں نے جی بھر کر لُوٹے۔جمعرات کو بھی اسی ہوا کا سلسلہ جاری تھا اور موسم کے گرم ٹمپریچر میں گذشتہ دنوں کے درجہ حرارت سے دو درجے کم نوٹ کیا گیا۔ آسمان پر دوپہر اور شام کے وقت بادل بھی آگئے اور لگتا تھا کہ بارش ہوگی لیکن بارش نہ ہوئی ، ہوا کی وجہ سے موسم قدرے ٹھنڈا ہوگیا۔ ٹمپریچر زیادہ سے زیادہ ۳۴ اور کم سے کم ۲۷؍درجہ سینٹی گریڈتھا۔ (ابو سدید)
