مورخہ۱۴تا۲۷؍جولائی ۲۰۲۵ء کے دوران حضرت خليفۃ المسيح الخامس ايدہ اللہ تعاليٰ بنصرہ العزيز کي گوناگوں مصروفيات میں سے چند ايک کی جھلک ہديۂ قارئين ہے: ٭…۱۸؍جولائی بروز جمعۃ المبارک: حضورِ انور ايدہ اللہ تعاليٰ بنصرہ العزیز نے آج مسجد مبارک، اسلام آباد یوکے ميں خطبہ جمعہ ارشاد فرمايا جو ايم ٹي اے کے مواصلاتي رابطوں نيز يوٹيوب اور ديگر ميڈيا پليٹ فارمز کے ذريعہ ساري دنيا ميں سنا اور ديکھا گيا۔ (خلاصہ خطبہ جمعہ کے لیے ملاحظہ فرمائیں الفضل انٹرنیشنل ۲۳؍جولائی ۲۰۲۵ء) ٭…حضور انور نے آج شام کو اسلام آباد کے مختلف حصوں کا راؤنڈ فرمایا اور اس موقع پر موجود بچوں میں چاکلیٹس تقسیم فرمائیں۔ ٭…۲۳؍جولائی بروز بدھ: حضور انور ايدہ اللہ تعاليٰ بنصرہ العزيز نے آج دوپہر بارہ بجے اپنے دفتر سے باہر تشریف لاکر مکرم ڈاکٹر شکور اسلم خان صاحب ابن حضرت محمد ظہور خان صاحبؓ (پٹنی، یوکے) کی نماز جنازہ حاضر اور ۹؍مرحومین کی نماز جنازہ غائب پڑھائی۔ ٭…۲۴؍جولائی بروز جمعرات: حضور انورایدہ اللہ تعالیٰ بنصرہ العزیز نے آج شام کو حدیقۃ المہدی میں جلسہ سالانہ برطانیہ ۲۰۲۵ء کے انتظامات کا معائنہ فرمایا اور سات بج کر سات منٹ پر جلسہ گاہ میں تشریف لاکر کارکنان جلسہ سالانہ سے مختصر خطاب فرمایا اور دعا کروائی۔ ٭…۲۵؍جولائی بروز جمعۃ المبارک: حضورِ انور ايدہ اللہ تعاليٰ بنصرہ العزیز نے آج جلسہ گاہ، حدیقۃ المہدی، آلٹن ميںخطبہ جمعہ ارشاد فرمايا جو ايم ٹي اے کے مواصلاتي رابطوں نيز يوٹيوب اور ديگر ميڈيا پليٹ فارمز کے ذريعہ ساري دنيا ميں سنا اور ديکھا گيا۔ ٭…حضور انور نے آج ساڑھے چار بجے کے قریب ۵۹ویں جلسہ سالانہ برطانیہ کی تقریب پرچم کشائی میں لوائے احمدیت لہرایا اور دعا کروائی۔ اس کے بعد حضور انور نے جلسہ سالانہ کے افتتاحی اجلاس میں خطاب فرمایا۔ ٭…۲۶؍جولائی بروز ہفتہ: حضور انور نے آج جلسہ سالانہ کے دوسرے روز دوپہر بارہ بجے کے قریب مستورات کے اجلاس سے خطاب فرمایا۔ دعا کے بعد لجنہ و ناصرات نے اجتماعی طور پر مختلف زبانوں میں اپنے پیارے امام سے عقیدت کا اظہار کرتے ہوئے ترانے پڑھے۔ ٭…حضور انور نے آج چار بجے کے قریب جلسہ سالانہ برطانیہ کے دوسرے روز بعد دوپہر کےاجلاس سے خطاب فرمایا۔ ٭…۲۷؍جولائی بروز اتوار: آج جلسہ سالانہ برطانیہ کے ایک اہم انٹرنیشنل پروگرام ‘عالمی بیعت’ کا انعقاد ہوا جس کے لیے حضور انور ایک بج کر ایک منٹ پر مردانہ جلسہ گاہ میں تشریف لائے۔ امسال ۱۱۱؍ممالک سے ۵۰۰؍ سے زائد قوموں کے دو لاکھ ۴۹؍ہزار ۴۰۸؍افراد احمدیت میں داخل ہوئے۔ ٭…حضور انور نے آج سوا چار بجے کے قریب جلسہ سالانہ سے معرکہ آرا اختتامی خطاب فرمایا۔ دعا کے بعد حضور انور نے جلسے کی حاضری بتاتے ہوئے فرمایا کہ سکیننگ کی رپورٹ کے مطابق اس سال کی حاضری چھیالیس ہزار اکسٹھ(۴۶۰۶۱) ہے جو گذشتہ سال سے تین ہزار زیادہ ہے۔ اس کے بعد جلسہ گاہ میں موجود مختلف گروپس نے اپنے آقا کے حضور ترانے پیش کیے۔ یوں جلسہ سالانہ برطانیہ بخیر و عافیت اپنے اختتام کو پہنچا۔ (حضور انور کے خطبہ جمعہ اور خطابات کے خلاصہ جات کے لیے ملاحظہ فرمائیں الفضل انٹرنیشنل ۲؍اگست ۲۰۲۵ء) اس عرصہ کے دوران حضورِانور سے دنیا بھر سے جلسہ سالانہ برطانیہ پر تشریف لانے والے وفود نے ملاقاتیں کیں۔ نیز جلسہ میں شامل ہونے والے دیگر احمدی مہمانان کو بھی حضور انور کے ساتھ شرف ملاقات حاصل ہوا۔ دفتری ملاقات کی سعادت پانے والے احباب نے اپنے پیارے امام سے متفرق امور کی بابت ہدایات اور راہنمائی حاصل کرنے کی توفیق پائی۔ اَللّٰھُمَّ اَیِّدْ اِمَامَنَا بِرُوْحِ الْقُدُسِ وَ کُنْ مَعَہٗ حَیْثُ مَا کَانَ وَانْصُرْہُ نَصْرًا عَزِیْزًا ٭…٭…٭ مزید پڑھیں: ڈائری مکرم عابد خان صاحب سے ایک انتخاب(دورہ یورپ۔ ستمبر و اکتوبر ۲۰۱۹ء کے چند واقعات۔ حصہ چہارم)
