محض اللہ تعالیٰ کے فضل سے مورخہ ۳۰؍جنوری ۲۰۲۵ء بروز جمعرات، مدرسۃ الحفظ سیرالیون کے طالبعلم عزیزم حسن سیسے Hassan Sesayنے مدرسۃ الحفظ کےچھٹے حافظِ قرآن ہونے کا بابرکت اعزاز اپنے نام کیا۔ فالحمدللہ۔ اللہ تعالیٰ یہ اعزاز عزیزم، اس کے اہلِ خانہ اور جماعت کے لیے مبارک فرمائے۔آمین عزیزم حسن سیسے مکرم محمد لامین سیسے صاحب اور مکرمہ ماسا سیسے صاحبہ آف مویامبا Moyamba کے صاحبزادے ہیں۔ اگست ۲۰۲۲ء میں مدرسۃ الحفظ میں داخل ہوئے اور دو سال دو ماہ میں خاکسارحافظ اسداللہ وحید استاد مدرسۃ الحفظ کی زیرِ نگرانی قرآن کریم کا حفظ مکمل کیا۔مکرم طاہر احمد بھٹی صاحب پرنسپل جامعۃ المبشرین نے عزیزم سے آخری سبق سنا اور دعا کروائی جبکہ دیگر اساتذہ جامعۃ المبشرین نے بھی عزیزم کو تکمیلِ حفظ پر مبارکباد پیش کی۔ مدرسۃ الحفظ سیرالیون کا آغاز جون 2021ء کو محض اللہ کے فضل اور سیدنا حضرت خلیفۃ المسیح الخامس ایدہ اللہ تعالیٰ بنصرہ العزیز کی شفقت اور منظوری سے ہوا۔ تدریس کی ابتداء کُل ۵ طلباء (سب کا تعلق سیرالیون سے تھا) اور ایک استاد(خاکسار)سے ہوئی اور اِس وقت زیرِ تعلیم طلباء کی کُل تعداد ۱۵ ہے جن میں سے ۱۳ کا تعلق سیرالیون سے ہے جبکہ دو طالبعلم پاکستانی ہیں۔جولائی ۲۰۲۴ء میں مدرسۃ الحفظ میں دوسرے استاد حافظ محمد آصف صاحب کا تقرر ہوا۔اس وقت کل دو اساتذہ خدمت کی توفیق پا رہے ہیں۔ فالحمدللہ (رپورٹ : حافظ اسداللہ وحید مربی سلسلہ۔استاد مدرسۃ الحفظ سیرالیون)
