مجلس انصار اللہ سینیگال کے گیارھویں نیشنل اجتماع ۲۰۲۵ء کا انعقاد
محض اللہ تعالیٰ کے فضل و کرم سے مجلس انصاراللہ سینیگال کو اپنا نیشنل اجتماع مورخہ ۱۷ و ۱۸؍ اکتوبر۲۰۲۵ء کو احمدیہ مشن ڈاکار میں منعقد کرنے کی توفیق ملی۔ ۱۶؍اکتوبر بروز جمعرات ہی انصار دیگر ریجنز سے آنا شروع ہو گئے۔
مورخہ۱۷؍اکتوبر بروز جمعۃ المبارک اجتماع کا آغاز باجماعت نماز تہجد، فجر اور درس القرآن کے ساتھ ہوا۔ آٹھ بجے ناشتہ کے بعد انصار تیاری کرکے اجتماع گاہ تشریف لے آئے۔ ساڑھے نو بجے مکرم مالک گئی صاحب صدر مجلس انصاراللہ سینیگال اور مکرم بشارت نوید صاحب امیر جماعت احمدیہ سینیگال کی زیر صدارت افتتاحی اجلاس منعقد ہوا۔ تلاوت قرآن کریم، عہد اور نظم کے بعد علمی مقابلہ جات کا آغاز ہوا۔
بعد ازاں ۱۲؍ بجے حضور انور ایدہ اللہ تعالیٰ بنصرہ العزیز کا خطبہ جمعہ براہ راست دو زبانوں میں سننے کا انتظام تھا۔ نماز جمعہ و عصر کی ادائیگی کے بعد کھانا پیش کیا گیا۔ شام کو ورزشی مقابلہ جات کا انعقاد کیا گیا۔ نماز مغرب و عشاء کے بعد ایک مجلس سوال و جواب ہوئی۔
اگلے روز کا آغاز باجماعت نماز تہجد، نماز فجر اور درس القرآن کے ساتھ ہوا۔ سات بجے سے نو بجے تک ورزشی مقابلہ جات کا سلسلہ جاری رہا۔ اسی طرح ناشتہ کے بعد فائنل علمی مقابلہ جات ہوئے۔ تمام شاملین انصار نے بھرپور جوش و جذبے سے تمام پروگراموں میں حصہ لیا۔ گیارہ بجے علمی و تربیتی مجلس کا انعقاد ہوا جس میں مختلف موضوعات پر تقاریر پیش کی گئیں۔
دوپہر ایک بجے اختتامی اجلاس کا آغاز ہوا جس میں ۷؍علمی اور ۹؍ورزشی مقابلہ جات میں نمایاں پوزیشنز لینے والے انصار میں انعامات تقسیم کیے گئے۔ دعا کے ساتھ اجتماع اختتام پذیر ہوا۔ اجتماع میں انصار کی حاضری ۱۲؍ریجنز سے۶۰؍رہی۔ الحمدللہ
اللہ تعالیٰ تمام انصار کی ذہنی و جسمانی صلاحیتوں میں برکت ڈالے اور اجتماعات کے بابرکت ثمرات سے نوازے۔ آمین
(رپورٹ:حافظ مصور احمد مزمل۔ نمائندہ الفضل انٹرنیشنل)
٭…٭…٭
مزید پڑھیں: مجلس نصرت جہاں کے تحت کینیا کے دو مقامات پر فری ہومیو پیتھک میڈیکل کیمپس کا انعقاد
