۱۷؍ اکتوبر جمعۃ المبارک کو صبح فجر کے وقت ہوا آہستہ رفتار میں چل رہی تھی۔ آسمان صاف تھا۔ اس ليے تیز دھوپ دن بھرچمکتی رہی، تاہم ہوا کی وجہ سے موسم خوشگوار تھا۔ اتوار کو صبح کے وقت کسی قدر خنکی موجودتھی اور آسمان صاف تھا۔ سارا دن سورج اپنی کرنیں برساتا رہا اس ليے دھوپ سے گرمی میں کسی قدر تیزی آگئی۔ شام کے وقت موسم خوشگوار رہا کیونکہ ہوا کی وجہ سے خنکی آ موجود ہوئی۔ موسم کے لحاظ سے یہ ہفتہ بھی مجموعی طور پر ایک جیسا تھا۔ یعنی صبح اور شام کے وقت خنک، آسمان صاف ہونے سے اور بادلوں کی غیر موجودگی میں خشک رہا۔ دن کےوقت دھوپ کی وجہ سے گرمی محسوس ہوتی رہی۔ ہلکی ٹھنڈی ہوا دن بھر چلتی تھی۔ جس سے موسم خوشگوار رہا۔ اس ہفتہ میں بھی پنجاب سمیت پاکستان کے شمالی علاقہ جات میں تقریباً موسم کی یہی صورتحال رہی۔ صبح اور رات کے اوقات میں سردی بڑھ جاتی تھی اور دن بھر دھوپ اور گرمی براجمان رہتی۔ یاد رہے کہ محکمہ موسمیات کی اطلاع کے مطابق اس سال کا موسم سرما زیادہ سرد اور زیادہ عرصہ کے لیے ہوگا۔ تاہم اکتوبر کا موسم اپنی روایتی آب و تاب لیے آجکل جاری و ساری ہے، گرمی بھی موجود ہے اور کمروں کے اندر پنکھوں کی ہوا ٹھنڈی ہونے کی وجہ سے کھیس، چادریں اور کمفر ٹر وغیر ہ باہر آگئےہیں۔ بعض گھروں میں تو رات کے وقت پنکھے بند کردیتے ہیں یا ہلکی رفتار سےچلاتے ہیں، لوگ اپنے گھروں کی رضائیوں کو دھوپ لگوار ہے ہیں اور بعض تو روئی کی دھنائی کر اکے نئے سرے سے ان کو صاف کروارہے ہیں۔ اس ہفتہ کا مجموعی ٹمپریچر زیادہ سے زیادہ ۳۱؍ اور کم سے کم ۱۹؍ درجہ سینٹی گریڈ تھا۔(ابو سدید)
