https://youtu.be/K4d93l8oo2k میون جزیرہ ڈنمارک کے دار الحکومت کوپن ہیگن سے ۱۲۰؍کلو میٹر کے فاصلہ پر واقع ہے اور اس کی کُل آبادی ۹؍ہزار۳۸۵؍افراد پر مشتمل ہے۔ ۲۰۱۴ء میں اس جزیرہ پر پہلی دفعہ اس عوامی میلہ کا آغاز کیا گیا جو کہ وقت کے ساتھ ساتھ ہر سال ترقی کرتا گیا۔ امسال اس میلہ میں ۲۰؍ہزار سے زائد لوگوں نے شرکت کی۔ الحمدللہ، گذشتہ چھ سال سے جماعت احمدیہ ڈنمارک کو اس میلہ میں شرکت کی توفیق مل رہی ہے۔ اس میلے کا مقصد مقامی، علاقائی اور قومی تنظیموں کوایک جگہ اکٹھا کرنا اور ایک ایسا پلیٹ فارم دینا ہے جہاں وہ عوام کے ساتھ براہ راست بات چیت کرسکیں۔ اس میلہ میں سیاسی، سماجی اور دیگر تنظیمیں اپنا سٹینڈ لگاتی ہیں جہاں زائرین بآسانی مختلف سیاسی راہنماوٴں سے مل سکتے اور بات چیت کرسکتے ہیں۔ اس دو روزہ میلہ میں امسال بھی جماعت احمدیہ ڈنمارک کو مورخہ ۲۲و۲۳؍ اگست کو اپنا سٹال لگانے کی توفیق ملی۔ اس میلے کی انتظامیہ نے پہلے دن مختلف سکولوں اور کالجز کو مدعو کیا جو کہ پورے ریجن سے بسوں کے ذریعہ اس جگہ پہنچے اور اپنے سکول کا ایک دن اس میلے میں گزارا اور مختلف سٹالز سے معلومات حاصل کرتے رہے۔ جماعتی سٹینڈ پر قرآن کریم کا ڈینش ترجمہ نیز مختلف ڈینش لٹریچر رکھا گیا تھا جس میں لوگوں نے بڑی دلچسپی دکھائی نیز اسلام کے بارے میں مختلف سوالات کرتے رہے۔ اس موقع کی مناسبت سے ’محبت سب کے لیے نفرت کسی سے نہیں‘ کے بیجز بھی خاص طور پر تیار کیے گئے جن کو لوگوں نے بہت پسند کیا اور بیج لگا کر تصاویر بناتے رہے۔ الحمدللہ، یہ تبلیغی سٹال بہت کامیاب رہا۔ دو انصاراور تین خدام نے اس تبلیغی سٹینڈ میں شرکت کی اور لوگوں کو اسلام احمدیت کا پیغام پہنچانے کی توفیق پائی۔ اللہ تعالیٰ ہمیں مزید تبلیغ کے مواقع عطا فرماتا رہے۔ آمین (رپورٹ:اکرم محمود۔ نمائندہ الفضل انٹرنیشنل) ٭…٭…٭ مزید پڑھیں: جماعت احمدیہ آسٹریلیا کے سینتیسویں جلسہ سالانہ۲۰۲۵ء کا بابرکت انعقاد
