https://youtu.be/ZjPcml7bO24 محض اللہ تعالیٰ کےفضل وکرم سے مجلس خدام الاحمدیہ آئیوری کوسٹ کو اپنی چودہ روزہ سالانہ تربیتی کلاس مورخہ یکم تا ۱۴؍اگست ۲۰۲۵ء کو منعقد کرنے کی توفیق ملی۔ تربیتی کلاس کے انعقاد کے معاً بعد مورخہ ۱۵تا ۱۷؍اگست ۲۰۲۵ء مجلس خدام الاحمدیہ کےسہ روزہ اکیسویں نیشنل اجتماع کا انعقاد بھی عمل میں آیا۔ ہر دو پروگرامز کا انعقادآبیدجان شہر میں واقع جماعتی مقام مہدی آباد میں کیا گیا۔ امسال اللہ تعالیٰ کےفضل سے تربیتی کلاس کی کُل حاضری۱۵؍خدام پر مشتمل رہی جبکہ اجتماع کی کُل حاضری ۵۹۲؍رہی۔ الحمدللہ علیٰ ذالک نیشنل تربیتی کلاس مجلس خدام الاحمدیہ نیشنل تربیتی کلاس کا آغاز مورخہ یکم اگست بروز جمعۃ المبارک ہوا۔ تربیتی کلاس کے دوران روزانہ کے معمولات میں صبح سات بجے سے دوپہر ایک بجے تک اور پھر اڑھائی سے چار بجے سہ پہر تک کلاسز کا انعقاد شامل تھا۔ ان کلاسز میں یسرنا القرآن، فقہ، وفات مسیح، نظام جماعت، نماز، حیات مبارکہ حضرت اقدس مسیح موعودؑ، خلفائے احمدیت، تبلیغ کا طریقہ کار نیز معلومات عامہ جیسے مضامین کو شامل نصاب کیا گیا۔ ان کلاسز میں بطور اساتذہ مکرم عبدالسلام صاحب مبلغ سلسلہ، مکرم سلطان احمد صاحب مبلغ سلسلہ، مکرم داکیسگاہارون(Dakissaga Haroune) صاحب نائب صدر مجلس خدا م الاحمدیہ اور مکرم محمد کونے فوسینے (Kone Fousseny)صاحب نے خدمات سر انجام دیں۔ نماز عصر کے بعد سپورٹس پروگرام بھی کلاس کا ایک لازمی حصہ تھا۔ تربیتی کلاس کے اختتام پر مورخہ ۱۴؍اگست کو تمام شاملین سے تحریری امتحان لیا گیا جس میں اوّل پوزیشن عزیزم کماگاتے عبدالحی (Kamagate Abdoulaye) ریجن بواکے اور دوم پوزیشن عزیزم سیلایوسف (Silla Youssouf) ریجن بواکے اور تیسری پوزیشن عزیزم سیلا خلیل ابراہیم (Silla Khalil Ibrahim) نے حاصل کی۔ نیشنل اجتماع مجلس اطفال الاحمدیہ مورخہ ۱۵؍اگست بروز جمعۃ المبارک صبح نو بجے اطفال الاحمدیہ کے پانچویں نیشنل اجتماع کا باقاعدہ آغاز تلاوت قرآن کریم سے ہوا۔ تلاوت قرآن کریم و ترجمہ، عہد اطفال اور نظم کے بعد مکرم جابی مصطفیٰ (Diaby Moustapha) صاحب صدر مجلس خدام الاحمدیہ نے تمام اطفال سے علمی و تربیتی گفتگو کی اور سوال و جوا ب کی ایک محفل منعقد ہوئی نیز مجلس خدام الاحمدیہ گھانا سے آئے مہمانان کے ساتھ بھی اطفال کی ایک مجلس کا انتظام اس پروگرام کا حصہ تھا۔ اختتامی تقریر مکرم لقمان فرید احمد صاحب قائم مقام امیر و مبلغ انچارج آئیوری کوسٹ نے کی جس میں اطفال کو ’’خلافت سے محبت‘‘ پر توجہ دلائی گئی۔ اس اجتماع کا اختتام ساڑھے گیارہ بجے دوپہر دعا کے ساتھ ہوا۔ نیشنل اجتماع مجلس خدام الاحمدیہ نیشنل تربیتی کلاس کے معاً بعد مجلس خدام الاحمدیہ کو سہ روزہ نیشنل اجتماع منعقد کرنے کی توفیق ملی۔ اجتماع میں شرکت کے ليے مہمانان کرام کی آمد کا سلسلہ ایک روز قبل مورخہ۱۴؍اگست کو ہی شروع ہوگیا تھا۔ نماز مغرب و عشاء کے بعد مہمانان کرام کو اجتماع کے حوالے سے ہدایات دی گئیں جس کے بعد شاملین کی خدمت میں کھانا پیش کیا گیا۔ پہلا دن: اجتماع کے پہلے دن کا باقاعدہ آغاز باجماعت نماز تہجد سے ہوا۔ نماز فجر کے بعد مکرم سلطان احمد صاحب مبلغ سلسلہ نے درس بعنوان ’’آئیوری کوسٹ میں امن کے ماحول کی تلاش میں اللہ کو یاد کرنے کی ضرورت‘‘ دیا۔ بعد ازاں شاملین کی خدمت میں ناشتہ پیش کیا گیا جس کے دوران سپورٹس کے ابتدائی مقابلہ جات کا بھی آغاز ہوگیا۔ دوپہر بارہ بجے حضورانورایدہ اللہ تعالیٰ بنصرہ العزیز کے براہ راست خطبہ جمعہ سننے کا اہتمام تھا جس کے معاًبعد مقامی طور پر نماز جمعہ اور عصر ادا کی گئیں۔ افتتاحی اجلاس کا باقاعدہ آغاز زیر صدارت مکرم لقمان فرید احمد صاحب قائم مقام امیر و مبلغ انچارج آئیوری کوسٹ سہ پہر تین بجے تقریب پرچم کشائی سے ہوا جس میں لوائے مجلس خدام الاحمدیہ اور قومی پرچم لہرایا گیا۔ تلاوت قرآن کریم و ترجمہ، عہد اور عربی قصیدہ کے بعد مکرم جابی مصطفیٰ (Diaby Moustapha) صاحب صدر مجلس خدام الاحمدیہ نے اپنی تقریر میں شاملین کو خوش آمدید کہنے کے ساتھ ساتھ اجتماع کے انعقاد کی اہمیت بیان کی اور زیادہ سے زیادہ اس کے مقابلہ جات میں شرکت کی طرف توجہ دلائی۔ بعد ازاں مکرم قائم مقام امیر صاحب نے ’’خدام الاحمدیہ کی ذمہ داریاں از ارشادات حضرت خلیفۃالمسیح الخامس ایدہ اللہ تعالیٰ‘‘ کے موضوع پر تقریر کی جس کے بعد دعا کے ساتھ اس اجلاس کا اختتام ہوا اور خدام و اطفال کے مقابلہ جات کا باقاعدہ آغاز ہوا جو نماز مغرب وعشاء کی ادائیگی کے بعد تک جاری رہے۔ دوسرا دن: اجتماع کے دوسرے دن کا آغاز بھی باجماعت نماز تہجد سے ہوا۔ نماز فجر کے بعد مکرم عبد الکریم کونے صاحب معلم سلسلہ نے درس بعنوان ’’دنیاوی اور مذہبی تعلیم میں توازن کیسے یقینی بنایا جائے‘‘ دیا جس کے بعد خدام و اطفال کے مقابلہ جات کا سلسلہ دوبارہ شروع ہوا جو ناشتہ کے ساتھ ختم ہوا۔ دوسرے دن کے اجلاس کا آغاز زیر صدارت مکرم قائم مقام امیر صاحب تلاوت قرآن کریم و ترجمہ اور نظم سے ہوا۔ اس کے بعد مکرم سورو الحسن صاحب مبلغ سلسلہ نے ’’قومی استحکام کی جستجو میں ایک خادم کی ذمہ داری‘‘ کے عنوان پر تقریر کی جس کے بعد مختلف غیر از جماعت مہمانان کرام نے اپنے اپنے خیالات کا اظہار کیا۔ اس کے بعد خدام الاحمدیہ کی جانب سے ایک نمائش کا بھی اہتمام کیا گیا جس کا دورہ تمام آنے والے اطفال اور خدام کے علاوہ مہمانان کرام کو بھی کروایا گیا۔ نماز ظہروعصر کی ادائیگی اور ظہرانہ کے بعد بھی مقابلہ جات کا سلسلہ شام چھ بجے تک جاری رہا۔ نماز مغرب و عشاء کے بعد مقابلہ جات کا سلسلہ رات آٹھ بجے تک جاری رہا اور پھر رات کے کھانے کے بعد اجتماع کے دوسرے دن کا اختتام ہوا۔ تیسرا دن: اجتماع کے تیسر ے دن کا باقاعدہ آغاز بھی باجماعت نماز تہجد سے ہوا۔ نماز فجر کے بعد مکرم عبدالسلام صاحب مبلغ سلسلہ نے ’’خدام الاحمدیہ اور قربانی کی روح‘‘ کے موضوع پر درس دیا۔ بعدازاں مجلس عاملہ خدام الاحمدیہ، مبلغین کرام اور غیر ملکی مہمانان کی ٹیموں کا فٹ بال کا نمائشی میچ ہوا اور مہمانان کرام کو ناشتہ پیش کیا گیا۔ اجتماع کے اختتامی اجلاس کا باقاعدہ آغاز زیر صدارت مکرم عبد القیوم پاشا صاحب امیر و مبلغ انچارج آئیوری کوسٹ ہوا۔ تلاوت قرآن کریم و ترجمہ، عہد اور نظم کے بعد مجلس خدام الاحمدیہ کی سالانہ رپورٹ مکرم سلا اسماعیل صاحب معتمد مجلس خدام الاحمدیہ نے پیش کی جس کے بعد تقریب تقسیم انعامات کا انعقاد کیا گیا جس میں مقابلہ جات میں پہلی اور دوسری پوزیشنز لینے والے خدام و اطفال میں انعامات(اسناد، تمغے اور تحائف) تقسیم کیے گئے۔ اس کے بعد مہمانان کرام نےاظہار خیال کیا۔ اجتماع کی اختتامی تقریر مکرم امیر صاحب نے کی جس کے بعد اختتامی دعا کروائی اور اجتماع کا باقاعدہ اختتام ہوا۔ ظہرانے اور نماز ظہر و عصر کی ادائیگی کے بعد مہمانان کرام اپنے اپنے مقامات کی طرف روانہ ہوئے۔ اللہ تعالیٰ کے فضل وکرم سے امسال عَلم انعامی مجلس سینفرا نے حاصل کیا۔ اجتماع میں گھانا سے چار، برکینافاسو سے تین اور بینن اور مالی سے دو دو مہمانان کرام نے خصوصی طورپر شرکت کی۔ امسال علمی مقابلہ جات کے ضمن میں قاعدہ یسرنا القرآن، مقابلہ تلاوت، نظم، اذان، حفظ القرآن، دینی معلومات، ادائیگی نماز، تقریر، فی البدیہہ تقریر، مشاہدہ معائنہ، حفظ عہدو وعدہ اطفال، پیغام رسانی نیز معلومات عامہ کے مقابلہ جات شامل تھے جبکہ ورزشی مقابلہ جات میں بوری دوڑ، چمچ منہ میں پکڑ کر دوڑ، الٹی دوڑ، ایک پاؤں پر دوڑ، پنجہ آزمائی، فٹ بال، میراتھن، نشانہ بازی نیز رسہ کشی وغیرہ شامل تھے۔ اجتماع کی خبر مقامی اخبارات مثلاًSoir Info, Fraternité Matin میں شائع ہوئی جبکہ آن لائن اخبار AIP میں بھی اس کی خبر شائع ہوئی۔ اس کے ساتھ ساتھ سوشل میڈیا کے ذریعے بھی اس کی تشہیر کی جاتی رہی۔ اللہ تعالیٰ اس اجتماع کے انعقاد کے دُور رس اثرات مرتب فرمائے اور یہ اجتماع حقیقی رنگ میں روحانی تبدیلی کا موجب ہو۔ آمین (رپورٹ: وقارالحق۔مبلغ سلسلہ آئیوری کوسٹ) مزید پڑھیں: لجنہ اماء اللہ فن لینڈ کے نویں نیشنل سالانہ اجتماع ۲۰۲۵ء کا کامیاب انعقاد
