۱۵؍اگست جمعۃ المبارک کو نماز فجر کے وقت ہوا بند تھی اور حبس تھا۔ آسمان بادلوں سے خالی تھا ، جس سےموسم گرم ہوگیا۔ٹمپریچر زیادہ سے زیادہ ۳۸؍اور کم سے کم ۲۸؍درجہ سینٹی گریڈتھا۔ مسلسل ایک ماہ سے موسم مجموعی طور پر گرم ، خشک اور حبس والا چلا آرہا ہے ۔ ہفتہ سے سوموار تک موسم ایک جیسا رہا۔ ان دنوں میں حبس کچھ کم ہوا، دن بھر ہلکی ٹھنڈی ہوا چلتی رہی جو شام کے وقت تیز ہوجاتی۔ صبح کے وقت ہوا کے ساتھ ساتھ آسمان پر ہلکے بادلوں کی تہ بھی موجود تھی جس کی وجہ سے دھوپ مکمل طور پر زمین پر نہ پہنچ سکی، شام کے وقت گہرے سیاہ بادل آجاتے رہے ، ایسے لگتا تھا کہ بارش اب ہوئی کہ اب ہوئی۔ لیکن بارش شہر کے ارد گرد برس کر بادلوں کو اُڑا لے جاتی رہی ۔ منگل کو نماز فجر کے وقت ہلکی ٹھنڈی ہوا چل رہی تھی، بعد میں ہوا تیز ہوگئی ۔ یہ تیز ہوا دن بھر چلتی رہی اورساتھ ہی مکمل آسمان پر سیاہ بادلوں نے ڈیرہ ڈال دیا۔کچھ دیر بوندا باندی بھی ہوئی۔ رات کو خاص طور پر موسم خوشگوار ہوگیا۔بدھ کومطلع جزوی طور پر ابر آلود تھا۔ ٹھنڈی ہوا چلنے سے موسم اچھا ہوگیا۔سارا دن یہ ہوا چلتی رہی بلکہ شام کے وقت تو اس میں ٹھنڈک بھی آگئی۔جمعرات کو بھی اسی ہوا کا سلسلہ جاری تھا جس نے موسم اچھا بنا دیا۔ٹمپریچر زیادہ سے زیادہ ۳۴؍اور کم سے کم ۲۸؍درجہ سینٹی گریڈتھا۔(ابو سدید)
