https://youtu.be/wY8AeDW0Wdg اب سوچنا چاہئے کہ اس زمانہ کی حالت کس حد تک پہنچ گئی ہے کہ خدا اور اس کے رسول کی عظمت اس قدر بھی لوگوں کے دلوں میں نہیں رہی جس قدر ان لوگوں کی عظمت ہے جن کو کافر کہا جاتا ہے۔ اس تمام تقریر سے ہماری غرض یہ ہے کہ دراصل یہی لوگ دجّال ہیں جن کو پادری یا یوروپین فلاسفر کہا جاتا ہے۔ یہ پادری اور یوروپین فلاسفر دجّال معہود کے دوجبڑے ہیں جن سے وہ ایک اژدہا کی طرح لوگوں کے ایمان کو کھاتا جاتا ہے۔ (کتاب البریّہ، روحانی خزائن جلد ۱۳ صفحہ ۲۵۲ حاشیہ) اب یہ زمانہ جس میں ہم ہیں اس کی حالت پر نظر کرو کون کہہ سکتا ہے کہ اس میںمسلمانوں کی اندرونی حالت میں تغیّر نہیں ہوا۔ان کی عملی اور اعتقادی حالت بگڑ گئی ہے۔ان کی اخلاقی حالت تباہ ہوگئی ہے۔جس پہلو سے دیکھو اور جس حیثیت سے نظر کرو اسے دیکھ کر رونا آتا ہے۔بیرونی حالت دیکھتے ہیں تو وہ اور بھی قابل افسوس ہے۔اسی ملک میں لاکھوں مرتد ہوگئے ہیں۔یہ وہ دین تھا کہ ایک بھی مرتد ہوجاتا تو قیامت آجاتی مگر اب یہ حالت ہے کہ دو چار روپیہ کے لالچ میں آکر گرجا میں جا کر مرتد ہوجاتے ہیں۔آپس میں ایک دوسرے کے حقوق تلف کرتے ہیں۔قرضہ لے کر دینے کا نام نہیں لیتے۔طرح طرح کے معاصی اور فسق و فجور میں مبتلا ہیں۔اب کیا یہ حالت زمانہ ایسی تھی کہ خدا تعالیٰ چپ رہتا اور اس کی اصلاح کے لیے کسی کو نہ بھیجتا؟ اگر وہ چپ رہتا تو پھر عذاب آتا اور اس کو تباہ کر دیتا۔مگر نہیں، اس نے اپنی رحمت سے ایک شخص کو بھیج دیا ہے جو تم ہی میں سے آیا ہے۔اس کے آنے کی غرض یہی ہے کہ تا وہ فساد مٹا دیئے جاویں جو اسلام میں اور مسلمانوں میں پیدا ہوچکے ہیں اور جنہوں نے ان کو اس ذلیل حالت تک پہنچا دیا ہے۔لیکن یاد رکھو اس کا آنا فضول ہوجاتا ہے اگر لوگ اس بات کو مضبوط نہ پکڑیں جو وہ لے کر آیا ہے صرف اتنی بات پر خوش ہوجانا کہ ہم میں ایک رسول آیا ہے کافی نہیں۔جب حضرت لوط علیہ السلام کی قوم پر عذاب آیا۔کیا وہ اس وقت زندہ نہ تھے؟ یا موسیٰ علیہ السلام کے وقت میں اسرائیلیوں پر بعض عذاب آئے تو وہ ان کے ساتھ نہ تھے؟ اتنے پر خوش نہ ہو کہ ہمارے پاس خدا کا مرسل ہے جو شخص اس دھوکا میں ہے قریب ہے کہ وہ ہلاک ہوجاوے۔خدا تعالیٰ کسی کی رعایت نہیں کرتا۔یاد رکھو! اسلام ایک موت ہے۔جب تک کوئی شخص نفسانی جذبات پر موت وارد کر کے نئی زندگی نہیں پاتا اور خدا ہی کے ساتھ بولتا، چلتا، پھرتا، سنتا، دیکھتا نہیں۔وہ مسلمان نہیں ہوتا۔ (ملفوظات جلد ۹ صفحہ ۲۹،۲۸ ایڈیشن ۲۰۲۲ء)
