Listen to 20211001_sierra leone report byAl Fazl International on hearthis.at محض اللہ تعالیٰ کے فضل سے سیرالیون میں نئے تعلیمی سال کے آغاز پر طاہر احمدیہ سیکنڈری سکول کیلاہوں میں مورخہ 23 ستمبر 2021ء کو جلسہ سیرت النبی صلی اللہ علیہ وسلم کا انعقاد کیا گیا۔ الحمدللہ علی ذالك ۔ جلسہ سے کئی دن پہلے مختلف کلاسز کا اہتمام کیا گیا جس میں طلباء و اساتذہ کو تلاوت، نظم اور سیرت طیبہ سے متعلق مختلف موضوعات پر تقاریر تیار کروائی گئیں۔ جلسہ کی کارروائی مورخہ 23 ستمبر 2021ء بروز جمعرات صبح نو بجے مکرم انیس احمد صاحب مربی سلسلہ کی زیر صدارت جلسہ سیرت النبیﷺ کا آغاز ہوا۔ طلباء و اساتذہ سکول کے احاطہ میں اس بابرکت جلسہ سے فیضیاب ہونے کے لیے جمع تھے۔ جلسہ کا آغازسورة الفتح کی آیت نمبر 28 کی تلاوت سے ہوا۔ بعد ازاں ایک طالب علم نے حضرت مسیح موعود علیہ الصلوٰة والسلام کانعتیہ منظوم کلام وہ پیشوا ہمارا جس سے ہے نور سارا نام اس کا ہے محمدؐ دلبر میرا یہی ہے مترنم آواز میں پڑھ کر سنایا۔ بعد ازاں متعدد طلباء و اساتذہ نے درج ذیل موضوعات پر تقاریر کیں۔ ٭…آنحضرتﷺ بطور انسان کامل، آنحضرتﷺکا اسوہ حسنہ، درود شریف کی فضیلت و برکات، شمائل محمد صلی اللہ علیہ وسلم ، آپ صلی اللہ علیہ وسلم کی سادہ طرززندگی اور حضرت مسیح موعودؑکا عشق رسول صلی اللہ علیہ وسلم اس کے بعد کیلاہوں کے سرکٹ مشنری مولوی یوسف سعید صاحب نے آنحضرتﷺ بطور رحمة للعالمین کے موضوع پر تقریرکی اور آخر پر انیس احمد مربی سلسلہ و استاد طاہر احمدیہ سیکنڈری سکول کیلاہوں نے آنحضرتﷺ کا بچوں سے حسن سلوک کے موضوع پر تقریر کی۔ جلسہ کے دوران درود شریف کا ورد جاری رہا نیز مناسب مواقع پر طلباء کی جانب سے نعرہ ہائے تکبیر بھی بلند ہوتے رہے۔ دعا کے ساتھ اس بابرکت روحانی جلسہ کا اختتام ہوا۔ الحمدُللہ جلسہ اللہ تعالیٰ کے فضل اور حضور پُر نور ایدہ اللہ تعالیٰ کی دعاؤں سے نہایت کامیاب رہا جس میں کُل 428افرادنے شرکت کی۔ درخواست ِدعا ہے کہ اللہ تعالیٰ تمام شاملین جلسہ کے ایمان واخلاص میں برکت ڈالے اور ان کو جلسہ کی برکات اور مقاصد سے بھر پور حصہ پانے کی توفیق عطا فرمائے ۔آمین ثم آمین ۔ ٭…٭…٭
