افریقہ (رپورٹس)

برکینا فاسو میں تقاریب آمین کا بابرکت انعقاد

قرآن مجید سیکھنا، سکھانا، اس کا پڑھنا اور دوسروں کو پڑھاتے  چلے جانا ایک ایسا مستقل کام ہے جس کا اختتام نہیں۔ جماعت احمدیہ کی یہ امتیازی شان ہے کہ خدمت قرآن میں ہمہ تن مصروف ہے۔ دنیا کے کونے کونے میں دن رات خدمت قرآن مجید کے پروگرام سارا سال جاری رہتے ہیں۔

مغربی افریقہ کے صحرائی ملک برکینا فاسو میں جماعت احمدیہ علمِ قرآن سے لوگوں کے دلوں کو گل وگلزار کرنے کی کوشش میں مسلسل مصروف ہے۔ درجنوں مشن، بیسیوں معلمین اور مربیان کرام، ذیلی تنظیمیں اور دیگر صاحبانِ علم اس کوشش میں ہیں کہ نور قرآن کو زیادہ سے زیادہ پھیلایا جائے۔ جہاں جماعت کے افراد کو قرآن مجید سکھانے کی کوشش جاری ہے وہاں ایسے خوش نصیب افراد کی حوصلہ افزائی بھی کی جارہی ہے جو قرآن مجید پڑھنے کی سعادت پا رہے ہیں۔ برکینافاسو کے مختلف ریجنز میں جب ایک تعداد قرآن مجید کا دور مکمل کر لیتی ہے تو اجتماعی ‘‘تقریب آمین’’ کا انعقاد کیا جاتا ہے تاکہ جہاں ان خوش نصیبوں کا نمونہ دوسروں کے لیے پیش کیا جائے وہاں نئے آنے والوں اور جنہوں نے ابھی یہ سعاد ت نہیں پائی، حوصلہ افزائی بھی کی جائے۔

برکینا فاسو میں ماہ جون 2021ء میں چار مختلف مقامات پر آمین کی بابرکت تقاریب منعقد ہوئیں۔ مجموعی طور پر  121 خوش نصیب افراد نے قرآن مجید کا دور مکمل کرنے کی سعاد ت پائی۔ ان تقاریب کا مختصر جائزہ پیش ہے:

ڈوری ریجن میں تقریب آمین کا انعقاد

مورخہ 6؍جون 2021ء کو ڈوری شہر میں تقریب آمین کا پروگرام ہوا۔ اس تقریب میں ریجن کی بعض جماعتوں کے احباب و خواتین شامل ہوئے۔ یہ بابرکت تقریب ڈوری کی ریجنل مسجد بیت الطاہر میں منعقد ہوئی۔ نیشنل ہیڈکواٹرز سے مکرم  امیر صاحب برکینافاسو کی نمائندگی میں مکرم حافظ منظور احمد صاحب اور مکرم ذیلا یوسف صاحب  پر مشتمل وفد  ڈوری تشریف لایا۔

تقریب کا آغاز تلاوت قرآن مجید سے ہوا۔ مکرم حافظ یوسف صاحب نے تلاوت و ترجمہ پیش کیا۔ مکرم حافظ منظور احمد صاحب  نے قرآن مجید ناظرہ کا دور مکمل کرنے والے خوش نصیبوں سے قرآن مجید کے مختلف حصے سنے اور ان میں اسناد تقسیم کیں۔ بعد ازاں مکرم ذیلا یوسف صاحب نے قرآن مجید کی عظمت کے حوالہ سے تقریر کی۔ مکرم شاکر مسلم صاحب ریجنل مبلغ سلسلہ ڈوری نے اختتامی دعا کروائی۔ اس موقع پر کل 22 افراد کی آمین ہوئی۔ جن میں سات خدام، پانچ انصار اور دس لجنہ شامل تھیں۔ اللہ تعالیٰ ان سب کے لئے یہ اعزاز مبارک فرمائے۔ آمین

سن کر قرآن مجید حفظ کرنے کا کارنامہ

یہاں یہ بات قابل ذکر ہے کہ Nimatoaa  (نیماتوآ) جماعت کے ایک ناصر مکرم عبداللہ Soumana صاحب جن کی عمر 45 سال ہے آنکھوں کی نعمت سے محروم ہیں۔ لیکن خدا تعالیٰ نے آپ کی اندرونی آنکھ غیر معمولی روشن کر دی ہے۔ آپ نے قرآن مجید سے عشق اور محبت کا اظہار اس طرح کیا ہے کہ تلاوت قرآن مجید سن سن کر سارا قرآن حفظ کر لیا ہے۔ آپ کو اس غیرمعمولی کام  کے سرانجام دینے میں دس سال لگے ہیں۔  اللہ تعالیٰ ان کے سینہ کو قرآن علوم سے منور فرمائے اور قرآن مجید سے محبت کے اس جذبے کا اجر عظیم عطا فرمائے۔

ڈوری ریجن میں تقریب آمین مورخہ 6؍ جون 2021ء

تینکو دوگو میں تقریب آمین کا انعقاد

تقریب آمین ۔ تینکو دوگو مورخہ 06 ؍جون 2021

  تینکو دوگو ریجن میں تقریب آمین مورخہ  06؍جون 2021ء کو منعقد ہوئی۔ اس تقریب میں نیشنل ہیڈ کواٹرز  سے مکرم امیر صاحب برکینا فاسو کی نمائندگی میں مکرم حافظ طیب احمد شاہ صاحب نیشنل سیکرٹری  تعلیم القرآن و وقف عارضی  تشریف لے گئے۔ آپ نے قرآن مجید ناظرہ کا دور مکمل کرنے والے خوش نصیب افراد سے قرآن مجید کے منتخب حصے سنے اور اسناد تقسیم کیں۔ آپ نے اپنے اختتامی کلمات میں احباب  جماعت کو قرآن مجید کا علم حاصل کرنے اور روزانہ تلاوت کرنے کی طرف توجہ دلائی۔ بعد ازاں آپ نے اختتامی دعا کروائی۔ اس تقریب میں کل 53افراد کی آمین ہوئی، جن میں 41 خدام وانصار اور 12لجنہ شامل تھیں۔مجموعی طور پر تقریب میں شامل ہونے والوں کی تعداد 155رہی۔ اللہ تعالیٰ ان سب کے لئے یہ اعزاز مبارک فرمائے۔

تینکو دوگو تقریب آمین میں شامل احباب

سفانے شہر میں تقریب آمین کا انعقاد

سفانے شہر میں آمین والے احباب کا گروپ فوٹو8؍جون2021

مورخہ 08؍جون 2021ء کو ددگو ریجن کی جماعت سفانے (SAFANE) شہر میں تقریب آمین کا بابرکت انعقاد ہوا۔ مکرم امیر صاحب برکینا فاسوکی نمائندگی میں مکرم حافظ طیب احمد شاہ صاحب نیشنل سیکریٹری تعلیم القران و وقف عارضی نے تقریب میں شرکت کی۔ صبح دس بجے تقریب کا آغاز تلاوت قرآن مجید سے ہوا۔ مکرم محب اللہ خالد صاحب ریجنل مبلغ سلسلہ ددگو نے احباب جماعت کے سامنے تقریب کا مقصد اورتعارف پیش کیا۔ اس کے بعد مکرم حافظ طیب احمد شاہ صاحب نے قرآن مجید ناظرہ مکمل کرنے والے خوش نصیبوں سے قرآن مجید کے مختلف حصے سنے اور اسناد تقسیم کیں۔ تقریب سے مخاطب ہوتے ہوئے آپ نے اپنے اختتامی کلمات میں احباب جماعت کو تلاوت قرآن مجید کی طرف توجہ دلائی اور ناظرہ قرآن کا دور مکمل کرنے والوں کو مبارکباد دی۔ تقریب کے اختتام پر آپ نے دعا کروائی۔ اس پروقار تقریب میں حاضرین کی کل تعداد 230 رہی۔ جس میں گاؤں کے معززین اورغیر از جماعت احباب بھی شامل ہوئے۔ سفانے شہر کی اس تقریب میں کل 38 افراد کی آمین ہوئی۔ تقریب میں شامل خدام سفید شرٹس اور کالی پینٹ پہن کر شامل ہوئے۔

سفانے شہر میں آمین والے احباب کا گروپ فوٹو8؍جون2021

’نونا‘ میں تقریب آمین کا انعقاد

مورخہ 09 جون کو ددگو ریجن کی ایک اور جماعت نونا Nouna میں تقریب آمین منعقد کی گئی۔ تقریب کا آغاز تلاوت قرآن مجید سے ہوا۔ مکرم حافظ طیب احمد شاہ صاحب نے خدام سے قرآن سنا اور سندات تقسیم کیں۔ اس تقریب میں قرآن مجید ناظرہ مکمل کرنے والے تمام خوش نصیب مجلس خدام الاحمدیہ سے تعلق رکھتے ہیں۔ تقریب کی مجموعی حاضری 145 افراد رہی۔ پروگرام کے اختتام پر احباب  جماعت کی خدمت میں کھانا پیش کیا گیا۔

’نونا‘ میں تقریب آمین  والوں کا گروپ فوٹو

حضرت مصلح موعود  ؓجماعت احمدیہ کو خدمتِ قرآن کی طرف توجہ دلاتے ہوئے فرماتے ہیں کہ:

’’ہماری جماعت کو کوشش کرنی چاہئیے کہ دنیا قرآن کریم کی خوبیوں سے واقف ہو اور قرآن کریم کی تعلیم لوگوں کے سامنے بار بار آتی رہے۔ تا کہ دنیا اس کے سایہ تلے آکر امن حاصل کرسکے۔‘‘ 

(روزنامہ الفضل 14؍ستمبر1940ء)

اللہ تعالیٰ جماعت احمدیہ برکینافاسو کو قرآن مجید کی تعلیم کو احباب جماعت  تک پہنچانے، اس پر عمل کرنے اور اس نور ہدایت کو پھیلانے کی توفیق عطا فرماتا چلا جائے۔  آمین

(رپورٹ: چوہدری نعیم احمد باجوہ۔ برکینا فاسو)

متعلقہ مضمون

رائے کا اظہار فرمائیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

For security, use of Google's reCAPTCHA service is required which is subject to the Google Privacy Policy and Terms of Use.

I agree to these terms.

Back to top button
Close