یورپ

جماعت احمدیہ سوئٹزرلینڈکے عہدیداران کا نیشنل ریفریشر کورس

(صباح الدین بٹ۔ نمائندہ الفضل انٹرنیشنل سوئٹزرلینڈ)

اللہ تعالیٰ کے فضل سے جماعت احمدیہ سوئٹزرلینڈ کی نیشنل عاملہ اور مقامی صدران جماعت کا نیشنل ریفریشر کورس مورخہ 18؍جنوری 2020ء بروز ہفتہ کو نور مسجد ویگولٹینگن میں منعقد ہوا۔ اس کورس میں اکیالیس (41)افراد شامل ہوئے۔

صبح ساڑھے دس بجے پروگرام کا آغاز تلاوتِ قرآنِ کریم سے مکرم ولید طارق تارنتسر صاحب نیشنل امیر سوئٹزرلینڈ کی صدارت میں ہوا۔ تلاوت قرآنِ کریم اور نظم کے بعد نیشنل امیر صاحب نے حاضرینِ ریفریشر کورس سے خطاب کرتے ہوئے انہیں ان کی ذمہ داریوں کی بابت ہدایات دیں۔

بعد ازاں مبلغ انچارج سوئٹزرلینڈ مکرم عرفان احمد ٹھاکر صاحب نے اپنی تقریر میں نظامِ جماعت کے موضوع پر خلفائے احمدیت کے ارشادات کی روشنی میں عہدیداران کو نصائح پیش کیں۔

اس کے بعد پروگرام کے مطابق نیشنل سیکرٹری صاحب امورِ خارجہ اور نیشنل سیکرٹری صاحب تبلیغ نے اپنے اپنے شعبہ کی ذمہ داریوں کے متعلق احباب کو تفصیلاً آگاہ کیا اور ہدایات دیں۔ اس دوران سوال و جواب کا سلسلہ بھی جار ی رہا۔

بعد ازاں ہمارے پیارے امام حضرت خلیفۃ المسیح الخامس ایدہ اللہ تعالیٰ بنصرہ العزیز کے دو خطباتِ جمعہ کے کچھ حصے سنائے گئے جن میں حضورِ انور نے عہدیداران کو تقویٰ اور باہمی تعاون سے خدمات سر انجام دینے کی طرف توجہ دلائی تھی۔

اس کے بعدعہدیداروں کے تین گروپس تشکیل دیے گئے،جن میں ایک ایک مربی سلسلہ بھی شامل ہوئے۔ ان گروپس میں تربیت، مال، وقفِ نو اور وصیّت جیسے موضوعات زیرِ بحث آئے۔ ہر گروپ نے باہمی مشاورت سے مذکورہ شعبہ جات کی کارکردگی میں مزید بہتری کے لیے اپنی تجاویز پر مشتمل رپورٹ احباب کے سامنے پیش کی۔ اس کے بعد کھانے اور نمازِ ظہرو عصر کا وقفہ ہوا۔
وقفہ کے بعد خاکسار کو تحریکِ جدید کے قواعد و ضوابط اور خلفائے احمدیت کے ارشادات کی روشنی میں عہدیداران کی ذمہ داریوں کے متعلق ایک پریزینٹیشن پیش کرنے کی توفیق ملی۔ نیز مختلف انتظامی امور کے متعلق سوالات کے جوابات دیے۔

پھر مکرم ڈاکٹر شمیم احمدقاضی صاحب نیشنل سیکرٹری امورِ عامہ و نیشنل سیکرٹری تربیت نے جماعتی خدمت اور ہماری ذمہ داریوں کے موضوع پر ایک پریزینٹیشن دی۔

ان کے بعد جماعت کے محاسب صاحب نے اپنے شعبہ کے حوالہ سے کچھ انتظامی باتیں بتائیں اور نیشنل سیکرٹری صاحب مال نے عہدیداران کو موجودہ بجٹ بتایا اور اسے مزید کس طرح بڑھایا جا سکتا ہے کے طریق کے متعلق ہدایات دیں۔

آخر پر سوال و جواب کی ایک مختصر سی نشست ہوئی جس کے بعدمحترم نیشنل امیر صاحب سوئٹزرلینڈ کے اختتامی کلمات اور اجتماعی دعا کے ساتھ پروگرام اختتام پزیر ہوا۔

(رپورٹ :وفا محمد۔ نیشنل جنرل سیکرٹری و مربی سلسلہ)

مزید دیکھیں

متعلقہ مضمون

رائے کا اظہار فرمائیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
Close