۱۰؍اکتوبر جمعۃ المبارک کو صبح فجر کے وقت ہوا خراماں خراماں چل رہی تھی۔ آسمان صاف تھا۔ اس ليے تیز دھوپ دن بھر موجود رہی، تاہم ہوا کی وجہ سے موسم خوشگوار بنا رہا۔ اتوار کو صبح کے وقت کسی قدر خنکی تھی اور آسمان پر بادلوں کا کوئی نام و نشان نہ تھا۔ سارا دن سورج نے اپنی من مانی کی اور دھوپ سے موسم میں کسی قدر تیزی آگئی۔ شام کے وقت موسم خوشگوار تھا کیونکہ ہوا نے ایسا کر دکھایا تھا۔ موسم کے لحاظ سے یہ ہفتہ مجموعی طور پر ایک جیسا تھا۔ یعنی صبح اور شام کے وقت خنک، آسمان صاف ہونے سے اور بادلوں کی غیر موجودگی میں خشک رہا۔ دن کےوقت دھوپ کی وجہ سے گرمی محسوس ہوتی رہی۔ ہلکی ٹھنڈی ہوا دن بھر رواں دواں رہی۔ جس کی وجہ سے موسم خوشگوار بنا رہا۔ پنجاب سمیت پاکستان کے شمالی علاقہ جات میں بھی تقریباً موسم کی یہی صورتحال رہی۔ صبح اور رات کے اوقات میں سردی بڑھ جاتی تھی اور دن بھر دھوپ اور گرمی کا راج ہوتا تھا۔ محکمہ موسمیات کے اعلان کے مطابق اس سال کا موسم سرما زیادہ سرد اور زیادہ مدت کے لیے ہوگا۔ تاہم اکتوبر کا موسم اپنی روایتی آب و تاب لیے آجکل جاری و ساری ہے، گرمی بھی موجود ہے اور کمروں کے اندر پنکھوں کی ہوا ٹھنڈی ہونے کی وجہ سے کھیس، چادریں اور دلائیاں وغیر ہ باہر آگئی ہیں۔ بعض گھروں میں تو رات کے وقت پنکھے بند کردیتے ہیں یا ہلکی رفتار سےچلاتے ہیں۔ اس ہفتہ کا مجموعی ٹمپریچر زیادہ سے زیادہ ۳۱؍ اور کم سے کم ۱۹؍درجہ سینٹی گریڈ تھا۔(ابو سدید)
