21؍جون سال کا بڑا دن کیوں ہوتا ہے؟ بچو، 21؍جون سال کا سب سے بڑا دن سمجھا جاتا ہے۔ یہ دن گرمائی انقلاب شمسی (Summer solstice) نامی ایک فلکیاتی واقعہ ہے جو سال کے بڑے دن اورجنوبی کرّے میں موسمِ گرما کے آغاز کی نشان دہی کرتا ہے۔ یہ واقعہ عموماً 21؍جون کو ہی پیش آتا ہے لیکن مختلف ٹائم زون ہونے کی وجہ سے یہ 20یا22؍جون کو بھی ہوسکتا ہے۔اس دن خطِ استواء سے اوپر شمالی حصہ میں رہنے والی دنیا کی 90 فی صد آبادی سال کا سب سے بڑا دن اور سب سے چھوٹی رات گزارتی ہے۔ بچو! سمر سولسٹِس کے دوران سورج آسمان میں اپنے بلند ترین مقام پر ہوتا ہے۔ ایسا سال میں صرف ایک بار ہی ہوتا ہے جس کی وجہ دنیا کے محور کا سورج کے گرد اپنے مدار کی مناسبت سے 23.5 ڈگری کے زاویے پر جھکا ہوا ہونا ہے۔ اسی جھکاؤ کی وجہ سے دنیا کے موسموں میں بھی تبدیلی آتی ہے۔ 21؍جون سے پہلے اور بعد میں کئی دنوں تک الاسکا، کینیڈا اور گرین لینڈ سمیت آرٹک خطے میں رہنے والے لوگ آفتابِ نصف شب(Midnight sun)یعنی مسلسل دن کی روشنی میں رہتے ہیں اور دوسری طرف جنوبی نصف کرے میں 21؍جون سال کا سب سےچھوٹا دن ہوتا ہے اور دنیا کی دس فی صد آبادی جو ارجنٹائن، آسٹریلیا، نیوزی لینڈ میں رہنے والوں کے لیے یہ موسمِ سرما کی ابتدا ہوتی ہے۔ بچو! 21؍جون سال کا سب سے بڑا دن ہونے کے ساتھ ساتھ گرم ترین دنوں میں بھی شمار کیا جا تاہے۔ ماہرین فلکیات کے مطابق 21؍جون کے بعد راتوں کے دورانیے میں اضافہ اور دن کا دورانیہ مختصر ہونا شروع ہو جاتا ہے۔ تو بچو آپ کو آج کا سوال اور اس کا جواب کیسا لگا؟ ان شاءاللہ اگلے سوال اور اس کے جواب کے ساتھ پھر حاضر ہوں گا۔ آپ کا بھائی۔ خلیق احمد شرجیل(جرمنی)
