https://youtu.be/8pnwTeAyNDQ اللہ تعالیٰ کے فضل سے جماعت احمدیہ لائبیریا کی سترھویں نیشنل مجلس شوریٰ کا انعقاد ۲۵؍مئی ۲۰۲۵ء کو شاہ تاج احمدیہ ہائی سکول منروویا کے آڈیٹوریم میں ہوا۔ امسال مبلغین ومعلمین سلسلہ، ممبران نیشنل عاملہ اور ذیلی تنظیموں کی نمائندگی کے ساتھ کل حاضری ۱۸۰؍رہی جس میں ۱۲؍ریجنزسے وفود نے شرکت کی۔ الحمدللہ صبح گیارہ بجے مکرم نوید احمد عادل صاحب امیر و مبلغ انچارج لائبیریا کی زیر صدارت پہلے اجلاس کا آغاز تلاوت قرآن کریم و ترجمہ سے ہوا۔ معاً بعد مکرم امیر صاحب نے آیت مبارکہ وَشَاوِرۡہُمۡ فِی الۡاَمۡرِکی روشنی میں آنحضرتﷺاور صحابہ کرام ؓکی سنت مبارکہ کی روشنی میں نظام شوریٰ کی اہمیت و برکات پر تقریر کرتے ہوئے نظام شوریٰ کے طریق کار کو بھی مفصل بیان کیا اور آخر پر دعا کروائی۔ مکرم Tapehma Kortu صاحب نیشنل جنرل سیکرٹری نے گذشتہ سال کی تجاویز اورمنظور شدہ سفارشات پر عمل درآمد کی رپورٹ پیش کی۔ بعدہٗ امسال مجلس شوریٰ کے لیے حضور انور ایدہ اللہ تعالیٰ کی طرف سے منظور شدہ ایجنڈا پیش کیاگیا جو دو تجاویز تبلیغ اور مالی بجٹ پر مشتمل تھا۔ مکرم امیر صاحب نےپیش کردہ تجاویز پر غور و خوض کے لیے سب کمیٹیاں تشکیل دیں۔ مولانا ناصر احمد کاہلوں صاحب مبلغ سلسلہ اور ڈاکٹر عبد الحلیم صاحب ان سب کمیٹیوں کے صدان مقرر کیے گئے۔ سب کمیٹیوں کی تشکیل کے بعد نمازوں کی ادائیگی اور ظہرانہ کے لیے وقفہ کیا گیا۔ اس دوران سب کمیٹیوں نے مقررہ جگہوں پر اپنے اجلاسات منعقد کیے۔ سہ پہر تین بجے تلاوت قرآن کریم سے دوسرے اجلاس کا آغاز ہوا جس کے بعد سب کمیٹیوں کے صدور نے نمائندگان کے سامنے اپنی سفارشات پیش کیں۔ ایوان میں موجود نمائندگان کو بھی اظہار خیال کا موقع دیا جاتا رہا۔ سفارشات کے بعد آئندہ تین سال کے ليے نیشنل مجلس عاملہ کا انتخاب بھی عمل میں آیا۔ اختتامی تقریر میں مکرم امیر صاحب نے نمائندگان شوریٰ کو مالی قربانی خصوصاً چندہ عام کے معیار کو بہتر بنانے اور ہر جماعت کوایک زرعی فارم بنانے کی طرف توجہ دلائی۔ اختتامی دعا کے بعد نمائندگان کی روانگی کا سلسلہ شروع ہوا۔ اللہ تعالیٰ تمام شاملین کو کما حقہ اپنی ذمہ داریاں ادا کرنے کی توفیق عطا فرمائے۔ آمین (رپورٹ : فرخ شبیر لودھی۔ نمائندہ الفضل انٹر نیشنل ) ٭…٭…٭ مزید پڑھیں: جماعت احمدیہ ڈنمارک میں جلسہ یوم خلافت کا بابرکت انعقاد
