ربوہ کا موسم(۳۱؍جنوری تا۶؍فروری۲۰۲۴ء)
۳۱؍جنوری جمعۃ المبارک کوفجر کے وقت ہلکی ٹھنڈی ہوا چل رہی تھی ۔ صبح دس گیارہ بجے کے وقت بادلوں کی تہ آسمان پر آ موجود ہوئی لیکن اس کے باوجود دھوپ میں تمازت اپنی جگہ تھی۔ ہفتہ سے منگل تک موسم ایک جیسا ہی تھا ، قابل ذکر تبدیلی واقع نہیں ہوئی۔ عمومی طور پر موسم خشک اور کم ٹھنڈا رہا ۔ آسمان صاف ہونے کی وجہ سے دھوپ خوب چمکتی رہی ، اس میں اتنی تمازت تھی کہ مستقل طور پر باہر بیٹھا نہیں جارہا تھا۔ ان دنوں کا زیادہ سے زیادہ اوسط ٹمپریچر۲۳؍اور کم سے کم ۸؍درجہ سینٹی گریڈ تھا ۔ امسال موسم سرما میں پاکستان میں خشک سالی کی وجہ سے غذائی پیداوار میں کمی واقع ہونے کے ساتھ ساتھ مٹی اُڑنے کی وجہ سے بیماریوں میں بھی اضافہ ہورہا ہے۔نزلہ ، زکام ، کھانسی اور بخار کی امراض زیادہ نوٹ کی گئی ہیں۔ربوہ کی بعض شاہراہوں پر چھڑکاؤ تو کیا جارہا ہے لیکن کچھ دیر بعد جب مٹی خشک ہوتی ہے تو پھر دھول اڑنا شروع ہوجاتی ہے۔ گندم کی فصل کے لیے بھی ان دنوں میں بارش کی سخت ضرورت ہے۔خشک موسم میں طوالت کوئی اچھی علامت نہیں ہے۔
بدھ کو سارا دن ہلکے بادل چھائے رہے۔ اس کے ساتھ ساتھ تیز ٹھنڈ ی ہوا بھی چلتی رہی جو اپنے ساتھ بادلوں کو تو لے اُڑی لیکن رات گئے تک تیز ٹھنڈ ی ہوا چلنے سے سردی میں کافی اضافہ ہوگیا۔ پچھلے ایک ہفتہ سے براجمان ہونے والی گرمی کا زور ٹوٹ گیا۔ٹمپریچرزیادہ سے زیادہ ۲۲؍او ر کم سے کم ۹؍درجہ سینٹی گریڈ تھا۔ جمعرات کو بھی آسمان پر ہلکے بادلوں کی تہ موجود تھی ساتھ ساتھ تیز ٹھنڈی ہوا بھی چل رہی تھی اور دھوپ نکلی ہوئی تھی۔ دوپہر کے بعد ہلکے بادلوں کی تہ کی وجہ سے دھوپ میں کچھ کمی واقع ہوگئی اور خنکی میں اضافہ ہوگیا۔ درجہ حرارت میں ایک ڈگری کمی ہوئی۔
(ابو سدید)
مزید پڑھیں: ربوہ کا موسم(۱۷تا ۲۳؍جنوری ۲۰۲۵ء)
