متفرق شعراء

سخنوروں کے شہر میں وہ شہ سُخن کمال است

سخنوروں کے شہر میں وہ شہ سُخن کمال است

گُلاب تو ہزار ہیں وہ گُل بدن کمال است

مِرے لیے وہی تو ہے متاعِ جاں جمالِ زیست

اگر وہ ساتھ چھوڑ دے، مِرے لیے جہان نیست

سنو گے اُسکی گفتگو کہو گے بات ختم شد

ملے جو آفتاب سے کہو گے رات ختم شد

یونہی عطا نہیں ہوا اُسے مقامِ دلبری

مجھے دکھاؤ تو سہی کرے جو اُسکی ہمسری

اُسی پہ جاں فریفتہ یہ دل بصد نیاز ہے

غزل غزل سا شخص وہ جو سر تا پا نماز ہے

اگر ملے نہ یار تو گہر تمام سنگ و خِشت

کہ عاشقوں کے واسطے وِصالِ یار ہے بہشت

دِلم درِ فِراقِ تُو، جوں طفلِ اشکبار ہو

اذاں کہ انتظار میں جوں گوشِ روزہ دار ہو

اے شاہِ گُل مِرے لیے تِری رضا ہے تاج و تخت

یہی ہے میری داستاں یہی ہے میری سرگزشت

تُو پیار سے جو دیکھ لے تو ساغر و شراب کیا

کلام ہو تِرا اگر تو نغمہ و رُباب کیا

سدا رہے تُو شادماں گُلاب سے اے دلبرم

میں اپنا حال کیا کہوں میں جان و دل سے تُو شُدم

(مبارک صدیقی )

متعلقہ مضمون

رائے کا اظہار فرمائیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button